நண்பர்களுக்கு எனது முந்தைய பதிவான டவுசர் கிழியும் டாலர் அரசியலும் குப்பை கூட்டுபவர்களும் -அமேரிக்க பொருளாதார நெருக்கடி. யின் நோக்கம் பொருளாதார நெருக்கடி குறித்து ஒரு பயனுள்ள விவாதமாக தொடர வேண்டும் என்பதே. ஆனால், வழக்கம்போல் பின்னொட்டங்கள் தனிமனிதப் பிரச்சனை மற்றும் மார்க்சிய. எதிர்-மார்க்சிய கருத்தாக்கங்கள் பற்றியதாக மாறிச் செல்கிறது. மார்க்சியம்-எதிர்மார்க்சிய உரையாடல் நடத்தப்பட வேண்டிய தளம் வேறு. தவிரவும் இத்தகைய உரையாடல்கள் உலக அளவில் நடந்துகொண்டிருப்பவை. அவற்றை நடத்த விரும்பும் நண்பர்கள் ஆதாரத்துடன் மூலக்கட்டுரைகளையும் அல்லது தங்களது சுயமான புரிதல்களையும், கருத்துக்களையும் முன்வைப்பதன் மூலமே பயனுள்ள வகையில் இதனை புரிந்து எடுத்துச் செல்லமுடியும். தனிமனித தாக்குதல் இல்லாமல் முன்-அனுமானங்கள், காழ்ப்புணர்சிகள் இல்லாமல் ஆரோக்கியமான உரையாடலாக அவை அமையவேண்டும். இந்த இதழ் உயிரோசையில் தமிழின் முக்கிய எழுத்தாளர்களில் ஒருவரான இந்திராபார்த்த சாரதி கார்ல்மார்க்ஸும் வால் ஸ்ட்ரீட் வீழ்ச்சியும் என்று தனது பார்வையை முன்வைத்துள்ளார். அதில் முக்கியப்படுத்தும் மார்க்சிய நிலைப்பாடு என்பது முதலாளியம் தனது உள் நெருக்கடிகளால் சிதைவை சந்திக்கும் என்பதை இன்றைய பொருளாதார நெருக்கடி முன்கொண்டு வந்துள்ளதை சுட்டிக் காட்டுகிறார்.
மார்க்சின் உபரிமதிப்பு பற்றியக் கொட்பாடு விஞ்ஞானபுர்வமற்றது என்று சொல்லும் நண்பர் அதியமான் அதற்கான ஆதாரங்களையும் தனது சிந்தனைகளையும் தமிழில் முன்வைத்தால் பரவலாகப் புரிந்துகொள்ள ஏதுவாகும். மார்க்சியத்தை சகலோரோக நிவாரணியாகக் கான்பதும், மார்க்சியம் காலாவதி அடைந்துவிட்டது என்பதும் அடிப்படையில் சாரம்சவாத தன்மைக்கொண்ட பார்வைகள்தான். இவை இரண்டுமே மார்க்சிய வார்த்தையில் கூறினால் இயங்கியலை மறுப்பவை. சமூக வளர்ச்சிக்கு கேடானவை. மார்க்சியம் என்பது சமூகவளர்ச்சிக்கேற்ப தன்னை தகவமைத்துக் கொள்ளும் ஒரு இயங்கியல் பார்வையைக் கொண்டது. அப்படி இது இயங்குவதால்தான் இன்றுவரை உயிர்ப்புள்ள ஒரு சிந்தனைமுறையாக உள்ளது.
உரையாடலில் பங்குபெற்ற நண்பர்கள் அனைவருக்கும் நன்றி.
அன்புடன்
ஜமாலன்.
அமெரிக்காவில் பல மாபெரும் நிறுவனங்கள் திவாலாகி வருகின்றன. திருப்பிக் கொடுக்கும் சக்தியை மீறி எக்கச்சக்கமான கடன்கள் கொடுக்கப்பட்டதால் வராக் கடன்கள், கடன் கட்டாமல் விட்டவர்கள் விகிதம் பெரிதும் அதிகமாகிவிட்டது. இன்னொரு பக்கம் அமெரிக்கப் பொருளாதாரத்தின் மீது அமெரிக்கர்களுக்கே நம்பிக்கை இல்லாததால் செலவைக் குறைக்க ஆரம்பித்திருக்கிறார்கள். இதனால் பொருட்கள், சேவைகளுக்கான தேவை குறைகிறது. உற்பத்தி குறைகிறது. வேலை இழப்பு ஏற்படுகிறது. முதலீட்டாளர்களும் பங்கு வர்த்தகத்தின் அளவைக் குறைப்பதால் அதன் புள்ளிகளும் சரிகிறது. எல்லா நாடுகளிலும் 6-10 வருடங்களுக்கு ஒரு முறை வரும் தற்காலிகப் பொருளாதார வீழ்ச்சியைத்தான் அமெரிக்காவும் இப்போது சந்திக்கிறது. உலகமே ஒரு கிராமமாக மாறிவிட்ட இன்றைய யுகத்தில் ஒரு நாட்டின் வீழ்ச்சி மற்றொரு நாட்டை பாதிப்பது சாத்தியம்தான் என்று மேலோட்டமாகப் பார்க்கும்போது தெரியும். அமெரிக்காவுக்கான ஏற்றுமதியை பிரதானமாகக் கொண்டிருக்கும் நாடுகள் அந்நாட்டின் வீழ்ச்சியால் பாதிக்கப்படுவதில் என்ன ஆச்சரியம் என்றுகூடப் பலரும் கேட்கக்கூடும். ஆனால் உலகப் பொருளாதாரத்தில் அமெரிக்கா ஆடி வரும் சித்து வேலைகள் பற்றி அறிந்தால் பிரச்சினை அவ்வளவு மேலோட்டமானது அல்ல என்று உங்களுக்குப் புரியும்.
ஜனநாயகத்திற்கு இடம் கொடுக்காத வளைகுடா மன்னராட்சிகளுக்கு அமெரிக்கா அடியாள் போல இருப்பது ஏன் என இப்போது உங்களுக்குப் புரிந்திருக்கும். அவர்கள் உதவியுடன்தானே டாலர்களை உலகெங்கும் பரப்ப முடியும். எனினும் அமெரிக்காவின் எண்ணெய் அரசியலுக்கு ஈராக்கின் சதாம் உசேன் வடிவில் முதல் சவால் வந்தது. அமெரிக்கா தங்கள் மீது குதிரைச் சவாரி செய்வதில் கடுப்படைந்திருந்த பிரான்ஸ், ஜெர்மனி போன்ற ஐரோப்பிய நாடுகளின் முன்முயற்சியில் யூரோ என்ற கரன்சி உருவான தருணம் அது. அமெரிக்காவின் அடிமைகளான வளைகுடாவின் ஓபெக் (எண்ணெய் ஏற்றுமதி) நாடுகளின் விதியை மீறி எண்ணெய் வர்த்தகத்தை யூரோ கரன்சியில் ஆரம்பித்தார் சதாம் உசேன். 2002ல் தனது கஜானாவிலிருந்த அத்தனை அமெரிக்க டாலர்களையும் ஈராக் தீர்த்துவிட்டிருந்தது. 2001 செப்டம்பர் 11 தாக்குதலையடுத்து ஆப்கானிஸ்தானைத் தாக்கிய அமெரிக்கா, இந்தத் தருணத்தில்தான் ஈராக் மீது படையெடுத்தது. பேரழிவு ஆயுதங்கள் இருக்கின்றன, வேதியியல் ஆயுதங்கள் இருக்கின்றன என்று ஐ.நாவை வைத்து பாவ்லா காட்டி போர் தொடுத்த அமெரிக்கா ஈராக்கில் குண்டு வீசாத ஒரே அரசுக் கட்டிடம் எது தெரியுமா? எண்ணெய் அமைச்சகக் கட்டிடம். நாட்டைக் கைப்பற்றிய பிறகு அமெரிக்கா செய்த முதல் காரியம் எண்ணெய்க் கிணறுகளை சீர் செய்து, பிறகு எண்ணெய் வர்த்தகத்தை டாலர் கரன்சியில் தொடங்கியதுதான்.
எண்ணெய் வர்த்தகம் மூலம் அமெரிக்க டாலருக்கான தேவை உலகச் சந்தையில் செயற்கையாக ஊதப்பட்டது. டாலரை ஸ்திரப்படுத்துவதற்காக அவ்வப்போது future trading மூலம் கச்சா எண்ணெயின் விலையில் ஏற்ற-இறக்கங்கள் உண்டாக்கப்பட்டன. இன்றைய பெட்ரோல்-டீசல் விலை உயர்வு கூட இதன் பாதிப்பில் ஒரு பகுதிதான். எண்ணெய் விலை அதிகமானால் அதிக டாலர் கொடுத்து அதை வாங்க நேரும். அது டாலருக்கான தேவையை அதிகரிக்கும். இப்போது அதை வைத்தே உலக நாடுகள் அமெரிக்காவை திருப்பி அடிக்க முடியும். எண்ணெய் வாங்க டாலர் தேவை என்பதைப் பயன்படுத்தித்தானே இத்தனை சித்து விளையாட்டுகளை நடத்தியது? இப்போது எண்ணெய்யை யூரோவில் வாங்க முடிகிற போது எனது கஜானாவை அடைத்துக்கொண்டிருக்கும் டாலரை வைத்து என்ன பயன் என்று உலக நாடுகள் டாலரைத் திரும்பக் கொடுத்துவிட்டு தங்கள் நாட்டு கரன்சியையோ தங்கத்தையோ கோரினால் அமெரிக்கா ஆடிப் போய்விடும். அமெரிக்கா அல்லாத நாடுகளிலுள்ள அன்னியச் செலாவணி முதலிய இருப்புக்களில் 66 சதவீதம் டாலர்களாக இருக்கிறது. அதில் ஐந்து சதவீதத்தைத் திருப்பிக் கொடுத்தால்கூட அமெரிக்கா ஓட்டாண்டியாகிவிடும். அப்படி ஒரு சூழல் ஏற்பட்டால் இந்தியாவின் செங்கல் சூளைகளிலும் அரிசி ஆலைகளிலும் கொத் தடிமைகளாக வேலை பார்க்கும் தொழிலாளர்கள் போல அமெரிக்கர்கள் உழைத்து ஒட்டுமொத்த உள்நாட்டு உற்பத்தியையும் ஏற்று மதியையும் அதிகரித்தால்தான் மீள முடியும். ஆனால் இவ்வளவு காலம் சுகமாக வாழ்ந்துவிட்ட அமெரிக்கர்கள் அதைச் செய்வார்களா எனத் தெரியவில்லை. முற்றிலும் புதிய அமெரிக்க கரன்சியை அச்சிடுவது மற்றொரு வாய்ப்பு. அமெரிக்கா உள்ளிட்ட உலக நாடுகளின் கஜானாக்களில் உள்ள அத்தனை பில்லியன்கணக்கான கரன்சியும் ஓரிரவில் வெற்றுக் காகிதங்களாகி விடும். அதைச் செய்ய அமெரிக்கா தயாராக இருக்குமா எனத் தெரியவில்லை. இன்னொன்றும் நடக்கலாம், உலகமே சேர்ந்து டாலர்களைத் திருப்பிக் கொடுக்கும்போது உள்நாட்டுக் குழப்பம் ஏற்பட்டு அமெரிக்கா நாசமாகிவிடக்கூடும். ஆனால் பொருளாதாரத்தில் சில காலம் முன்பே வலுவிழந்துவிட்டாலும் இன்னமும் வலுவான ராணுவத்தைக் கொண்டிருக்கும் அமெரிக்கா அத்தகைய ஒரு வாய்ப்பைத் தடுக்கத்தான் தீவிரமாக முயன்று வருகிறது. தனது எண்ணெய்ச் சூழ்ச்சியின் வீழ்ச்சி மூலம் தனக்கு ஏற்படக்கூடிய பாதிப்புகளைச் சமாளிக்க அமெரிக்கா தனது ராணுவ பலத்தைப் பயன்படுத்தக்கூடும். அதன் ஒரு பகுதிதான் ஈரான் மீதான போர் அறைகூவல்கள்.
இடுகைகள்
